நிகர் ...

உந்தன் நிமித்தம் 
"ஒருதலைக் காதலன் "
தகுதி எமக்கு 
சுலபத்தில் வாய்த்தது.. 

இருதலைப்படுத்தும் 
முஸ்த்தீபு எதுவுமற்று 
ஏக்கத் தீயின் லாகிரியில் 
லயித்துக் கிறக்கம்
கொண்டிருந்தேன்.. 

பூங்காக்களிலும் 
கடற்கரைகளிலும் 
காதலர்களைக் கண்டு 
மௌன நகைப்பில் 
மூழ்கினேன்....
-ஏனெனில் .. 
பரஸ்பரம்  காதலிப்பவர்கள்
ஒருதலை ஏக்கங்கள்
பரிச்சயமற்றிருப்பார்கள்...!

காதலி பூங்கா வர 
தாமதிக்கிற போதும், 
மனைவியாகி .. 
பிரசவத்திற்கு அம்மா 
வீடு போகிற போதும் 
நிகழ்கிற 
அற்ப ஏக்கங்களுக்கு 
நிகராகாது ... 
காதலியே கிடைக்காமல் 
ஏங்கித்திரிகிற 
ஒருதலைக்காதலின் 
வீரியம் ததும்பும் 
ஏக்கங்களின் முன்னர்.. !!

வைரம் போன்ற மாயை..

=========================

வாழ்க்கை நெடுக 
இழைகள்... 
துயரம் தொலைந்து 
சந்தோஷம்.. 
நோய் தொலைந்து 
ஆரோக்கியம்.. 
வறுமை தொலைந்து 
வசதி.. 
இதே ரீதியில் ... ஒரு நாள்.. 
உயிர் தொலைந்து 
மரித்தல்.. .. 

அந்த மரித்தல் மாத்திரம் 
உணரவியலா இழையாகி.. 
உடனிருப்போருக்கு 
நிம்மதி  நழுவிய 
சோக இழையாக .... 

எத்தனை வகையறா 
மரணங்களை அவ்வப்போது 
சந்தித்து வந்தாலும், 
இந்த வாழ்க்கை மட்டுமே 
அடர்த்தி நிரம்பியதாக 
அடையாளப் பட்டுக் கிடக்கிறது 
எல்லாருக்கும்.. !!

கிழிசல்கள்..

பவித்ரம் ததும்பிய 
உமது யெளவனம்.. 
ப்ராயங்கள் பற்பல 
கடந்த பிற்பாடும் 
என் மனம் விட்டகலா
தூரிகையாய் வியாபிக்கிறது.. 

உமது மெருகில் 
அன்றாடம் என்னில்
நிகழ்ந்த கிளர்ச்சி ரசாயனம் 
எலும்பையே உருக்கும் 
வீரியம் கொண்டன எனில் 
மிகையன்று.. !!

எவ்வளவு ஜனசந்தடியிலும் 
நீ வரும் பாதை---நீயற்று 
வெறிச்சோடியே காணும் 
----மாயைகளில் உழலப் 
பழகிய என் மனதுக்கு.. !

எவருமற்ற பாதையில் 
நிந்தன் வருகை என்பது 
நெரிசலில் திக்குமுக்காடும் 
என்னிதயம்.. !!

ஈவிரக்கமற்ற காலம் 
பெரிய இடைவெளி ஒன்றை 
வகுத்து .. எதுவுமற்றதாக்கிற்று 
எமதற்புத காதலை.. 
உமது நிமித்தம் எமது காதல் 
ஒருதலைப்பட்ச தகுதி மட்டுமே 
பெற்றிருந்ததை ஒரு புகார் போன்று 
நான் சொல்லலியாக வேண்டும் 
இந்த சந்தர்ப்பத்தில்.. !

நீயும் என்போன்றே 
என்மீது லயித்திருக்கும் பட்சத்தில் 
இன்று காலத்தை குற்றவாளிக்
கூண்டில்  நிறுத்தும் தேவை 
இருந்திருக்க வாய்ப்பில்லை.. ~~

இன்றைய முதுமையில் 
நான் பற்பல பிராந்தியங்களிலும்
கவனிக்கிறேன்.. 
உன்னைவிட அழகான 
பெண்களெல்லாம் ..
என்னைவிட அசிங்கமான 
ஆண்களோடு 
காதல் சல்லாபம் ஆடுவதைப் 
பார்க்கையில்.. 
என்னை விடாப்பிடியாக 
துரத்துகிற துரதிர்ஷ்டங்களை 
என்னால் அடையாளம் 
கண்டுகொள்ள முடிகிறது 
மிக சுலபமாக.. !!

மாநகரம் ... [சினிமா விமரிசனம்]

***********************************************


ரவுடியிஸத்தின் ஸ்தாயி படம் நெடுக.. 
ஹீரோயிசத்தை காண்பிக்கக் கூட ஒரு ரவுடி போலிருந்து தான் காண்பிக்க வேண்டுமென்கிற இன்றைய சினிமா தன்மையின் அமைப்பு...!
திரைக்கதை பின்னப் பட்ட வீச்சு, கயிற்று மீது நடை போன்ற எடிட்டிங்..
குண்டி அதிர சீட்டுக்கு அடியில் வந்து முழங்குகிற இசை.. யதேச்சையாக ஜன்னல் திறந்து தெருவை கவனிக்கையில் வெளிப்படுகிற பாதாச்சாரிகளின் அனிச்சையான செயற்பாடுகளை விழுங்கிக் கொண்டது போன்ற ஒளிப்பதிவு.. 
இத்தனை மெருகுகளும் ஒருசேர எவ்வாறு சாஸ்வதம் என்கிற ஆச்சரியங்களும் அதிர்ச்சிகளும்.. !

இவ்வளவு ஆர்ப்பரிப்புக்களுக்கு சொந்தக்காரன் ஒரு அறிமுக டைரக்டர் என்பது இன்னும் வாயை   அ க ல த் தி ற க் க  செய்கிறது.. 

இம்மாதிரியான நுணுக்கச் சித்தரிப்புக்களை கவனிக்கையில், இனி மேற்கொண்டு தமிழில் சுலபமான படங்களை எடுக்க ப்ரயத்தனிப்பவர்கள் சற்றே நிச்சயம் வெட்கம் கொண்டாக வேண்டியிருக்கும்.. 

தேர்ந்த ஒரு நகரத்தின் அவலங்களை, அங்கு வாழ்கிற மனிதர்களின் அவர்களது மனங்களின் அலங்கோலங்களை செவ்வனே காண்பிக்க தவறாதவர்கள், அழகியலையும் அதே விதமாக காண்பிக்கத் தவறவில்லை.. 

ஸ்வரங்களைக் காட்டிலும், சமயங்களில் அபஸ்வரங்கள் அபரிமிதம் வசீகரிக்க நேர்ந்து விடும்.. அதே விதமாகத் தான், அதியற்புத ஓவியங்களைக் காட்டிலும் ஒரு குழந்தையின் சுவர்க் கிறுக்கல்கள் அதீத அர்த்தம் பொதிந்ததாக மாறிவிடக் கூடும்.. 

அந்த கதியில் தான்.. இந்த மாநகரம் ... என்னென்னவோ சேர்த்து கோர்க்கப் பட்ட மணம் கமழும் பூச்சரமாக நம்மை மூர்ச்சையாக்குகிறது.. .

அனாமதேய ப் பட்டியல்..

உன்னைப் பார்த்தால் சொல்வதற்கென்று நீண்ட பட்டியல் தயாரித்து வைத்திருக்கிறேன்.. !!

முன்னர், என்றேனும் உன்னை தரிசிப்பதற்காக வாய்ப்பு நிச்சயம் என்றிருந்தவனுக்கு ... பின்னர், தரிசிப்பதற்காக வாய்ப்பு வரக்கூடுமோ வராமலே போய் விடுமோ என்கிற சந்தேகம் துவங்கிற்று.. 

அந்த சந்தேகமும் பொலிவிழந்து .. இனி உம்மை என்றென்றும் சந்திப்பதற்கே இல்லை என்கிற ஊர்ஜிதம் எதற்காகவோ ஒருகட்டத்தில் எனது ஆழ் மனதில் வேரூன்றிற்று.. 

ஆனபோதிலும், எமது பட்டியல் கிழித்துப் போடுவதற்கில்லை.. 
என் கைவசம் என்றென்றும் உள்ளது.. இத்தனை வகையறா குழப்பங்களுக்கு அப்பாலும், உம்மை தரிசிக்கிற வாய்ப்பு கிடைக்கத்தான் போகிறது என்றொரு அசரீரி எமது ஆழ்மன வேரினை துவம்சம் செய்கிற ஆயத்தத்தில் நின்ற வண்ணமாயுள்ளது.. !!

மிக முக்கிய பட்டியல் இது என்பதை நான் சொல்லியாக வேண்டும்.. 
அன்றைய எமது சிறுபிள்ளைத் தனங்களை தகர்த்து .. இன்றைய எந்தன் அற்புத முதிர்ச்சியை விலாவாரியாக விளக்குகின்ற முயற்சி இந்தப் பட்டியல்.. 
அன்றைய எனது சிறுபிள்ளைத் தனங்களுக்கே அகமலர்ந்த உமது பெருந்தன்மை, இன்றைய எனது முதிர்ச்சி கண்டு இன்னும் குதூகலிக்கும் என்பது எமது அனுமானம்.. 
அடக்கவியலாத அன்றைய எமது காதலின் நிமித்தம், உன்னிடம் அதனை ஒருவிதப் பாங்கற்று நான் தெரிவித்தும் கூட முகம் சுழிக்காது புன்னகை ததும்ப நீ இருந்தது---- அன்று என்னில் நிகழ்த்திய சிலிர்ப்பு , இன்றைய பொழுதில் வெட்கமாக வேதனையாக மாறியுள்ளதை எமது பட்டியல் இன்னும் நேர்த்தியாக உமக்கு சொல்லும்.. 

என்னுடைய அனைத்த இறந்தகால நடவடிக்கைகளுக்கும் உன்னிடம் மன்னிப்புக் கோரும் விதமாக செதுக்கப் பட்டுள்ளது எனது பட்டியல்.. 
நீ எந்த சலனங்களை உள்ளடக்கியும் என்னோடு பேசியதோ பழகியதோ இல்லை என்பதை அன்றும் இன்றும் நான் நன்கறிவேன் என்றான போதிலும் ..ஏனோ கேனத்தனமாக.. நீ என்னை மிகவும் மதியாத தன்மையில் நடத்துவதாக நான் புலம்பி உமக்கொரு கடிதம் எழுதி.. ஆம், அதற்கு உம்மிடமிருந்து வருகிற வழக்கமான பதில் கடிதம் வரவில்லை, என்பதோடு அதன் பிறகாக உன்னைப் பார்க்கவும் விழையாமற் போயிற்று..

``

குற்றம்  23......
================
[திரைப் பட சிறு விமரிசனம்]


ராஜேஷ்குமாரின் நாவலைத் தழுவித் புனையப்பெற்ற இத்திரைப் படம், அவரது நாவலுக்கு மேலும் மெருகூட்டியுள்ளது..
அறிவழகனின் இந்தப் புனைதல், தமிழ் சினிமா கலாச்சாரத்தின் மிக முக்கிய மைல்கல் எனில், அது மிகையன்று..
செதுக்கிவைத்தாற்போன்ற திரைக்கதையும், அதற்கேற்றாற்போன்ற பாத்திரங்களின் பங்களிப்பும், அவர்களின் யதார்த்த உன்னத நடிப்புக்களும் படம் நெடுக சோபை மிளிர்ந்து பார்ப்பவர்களின் இமைகளை பாம்புகள் போன்றே மூடாதிருக்க செய்திருக்கின்றன.. !

எஸ்.ஐ யாக அசத்தியுள்ள அருண்விஜய் ... இத்தனை கால மெனக்கெடல்களுக்குப் பிற்பாடான ஒரு வெற்றியினை சுவைக்க ரசிகர்கள் எல்லாம் ஒத்துழைக்குமாறு வேண்டிவிரும்பிக் கேட்டுக் கொள்கிறேன் ..

அலட்டலில்லாத பின்னணி இசை.. பிரபலமாவதற்கு வாய்ப்பில்லாத ரெண்டொரு பாடல்கள்.. தேவையற்ற இடங்களில் பொருத்தமான மவுனம் என்கிற விதமாக யதார்த்த இசை .. யாரோ ஒரு அறிமுக இசையமைப்பாளர் போலும்.. !

குழந்தையற்றவர்கள் படுகிற மன உளைச்சல், உடல் அயர்ச்சி, சமூகம் அவர்களை பிரித்துவைத்துக் காண்பிக்கிற பாரபட்சம், ...
உதவுகிறேன் என்று வருகிற இதன் வகையறா ஆசுபத்திரிகள் போடுகிற பொய்வேஷங்கள், .... அதன் பின்புலமாக செயல்பட்டு ஆதாயம் தேடுகிற கொள்ளைக்கும்பல் ... என்று தமிழசினிமா இதுவரை காணாத புது தளங்களில் பயணிக்கிறது படம்..

ஒன்றுமில்லாத குப்பைப் படங்களை தலையில் தூக்கிவைத்து ஆடுகிறோம்.. அவைகளுக்கு டீசர் ட்ரைலர் என்று சமூக தளங்கள் அடிக்கிற வெட்டிப் பறைகள் போதுமென்று நினைக்கிறேன்.. இம்மாதிரி அந்தஸ்துள்ள படங்களை மாத்திரம் ப்ரத்யேகமாகக் கொண்டாடப் படவேண்டுமென்று உங்களையெல்லாம் மிகத் தாழ்மையோடு  வேண்டிவிரும்பிக் கேட்டுக்கொள்கிறேன்.. நன்றி..  !!

பயில்வான்..
===============

எவர் கவிதையும் 
என்னை ஏனோ 
படிக்கத் தூண்டுவதே 
இல்லை... ஆனால் 
நான் எழுதுவதை 
அனைவரும் படித்துவிட 
வேண்டுமென்று 
அவாவும் அவசரமும் 
கொள்வதேனோ?

இந்த அநாகரீக 
சுயநலம் எனக்கே 
நாறுகிறது.. !

அர்த்தங்கள் பொதிந்தும் 
அழகியல் ததும்பியும் 
வெளியாகிற கவிதைகளை 
பிறர் பெரிதாகப் பிதற்றுகையில் 
வருவது பொறாமை 
ஒருபுறம் என்றால், 
என்னுடையதைப் படித்துவிட்டு 
ஏன் எவரும் இவ்வாறு 
குதிப்பதில்லை என்கிற 
அநியாய ஆதங்கம் மறுபுறம்.. !!

இளையராஜாவை 
தூக்கி அந்தப் பக்கம் நிறுத்திவிட 
வேண்டுமென்பது 
என்னுடைய இசைவெறியின் 
அகம்பாவம்.. 
தகரடப்பாக்களில்  
டண்டணக்கா தாளங்களை 
ஏற்படுத்துகிற எனக்கெதற்கு 
இவ்வளவு வறட்டு நம்பிக்கைகள் 
என்கிற அறிவான கேள்வி 
ஆரமபத்திலேயே வரத் 
தவறி விடுவதேனோ ?..

அங்ஙனமே பாரதியின் 
கவிதைகள், மற்றும் 
வள்ளுவனின் குரள்கள் 
அடக்கம்...!

சூரியனையே அற்பமாக 
அண்ணாந்து பார்த்துவிட 
முடிகிற என்னை..
காய்ந்து கிடக்கிற 
புற்கள் தடுக்கிவிழச் 
செய்கிற சூழ்ச்சியை 
நிச்சயம் நான் 
வணங்க மறுக்கிற 
தெய்வம் ஒன்று 
தான்  செய்திருக்கக் கூடும் 
என்பது எமது 
அசைக்க முடியாத 
நம்பிக்கை.. !!!